Монгол хүний дундаж наслалт 70-71 болсон. Тиймээс ахмадуудыг нийгмийн амьдралд идэвхитэй оролцуулах, идэвхитэй хөдөлмөр эрхлүүлэх орчныг бүрдүүлэх чиглэлд анхааран ажиллах зайлшгүй шаардлага үүсээд буй. Манай улсын хөдөлмөрийн зах зээлийн хэд хэдэн салбарт ажиллах хүчний хомсдолд хэдийн үүсчихсэн. Эдгээр салбарт тодруулбал боловсрол, эрүүл мэндийн салбарт ажиллаж байсан ахмадуудыг салбарын ажилд татан оролцуулах ажлыг Хөдөлмөр нийгмийн хамгааллын яамнаас санаачлан холбогдох яамдуудтай хамтран хэрэгжүүлэхээр зорьж буй аж.
Мөн ахмадуудын асуудалтай хамт үргэлж хөндөгддөг сэдэв бол яах аргагүй ахмадын тэтгэвэр, орлогын асуудал. Олон жил ажил хөдөлмөр эрхэлж нийгмийн даатгал төлчихөөд тэтгэвэрт гарахдаа хамгийн бага тэтгэвэр тогтоолгон гардаг ахмадууд цөөнгүй. Нийт ахмадуудын 60-70 хувь нь хамгийн бага тэтгэвэртэй байна гэсэн судалгаа ч бий.
Тэтгэврийг цаашдаа инцляцитай уялдуулж нэмэхээр хуульд тусгасан. Энэ дагуу 2025 оны улсын төсвийг өргөн барихдаа үнийн инфляци 6-6.5 хувиас хэтрэхгүй байхаар тооцоолсон учраас үүнтэй уялдуулж тэтгэврийг хамгийн багадаа 6 хувиар нэмэх болжээ.
Энэ намрын чуулганаар тэтгэврийн болон нийгмийн даатгалын багц хуулиудыг өргөн барихаар төлөвлөсөн бөгөөд эдгээртэй зэрэгцүүлэн хувийн тэтгэврийн тухай хуулийг өргөн барих аж. Ингэснээр хүн тэггэвэрт гарахдаа зөвхөн нийгмийн даатгалын сангаас бус олон эх сурвалжаас тэтгэвэр авах боломжийг бий болгоно гэж үзэж байгаа юм байна.
