Тайванийн телевизийн "Солирын од" олон ангит киноны гол дүр Барби Сюй буюу монголчуудын нэрлэж заншсанаар Санцай 48 насандаа хорвоогийн мөнх бусыг үзүүлжээ. Түүний гэр бүлийнхэн өнөөдөр албан ёсоор энэ мэдээг түгээв. Барби Сюй чухам хэзээ, хаана нас барсан нь тодорхойгүй байна.
Түүний дүү, Тайванийн телевизийн нэрт хөтлөгч Дий Сюй энэ тухай бичгээр мэдэгдэл гаргахдаа "Та бүхнийг анхаарал тавьж буйд талархлаа. Хятадын Хаврын баярын үеэр бид гэр бүлээрээ амрахаар Япон руу явсан. Гэвч хамгаас хайртай, сайхан сэтгэлтэй эгч Барби минь уушгины хатгалгаа тусч, биднийгээ харамсалтайгаар орхин одлоо. Энэ амьдралдаа түүний дүү болж төрөөд, олон жилийн турш бие биедээ анхаарал халамж тавьж явсандаа талархаж байна. Түүнд үргэлж талархахын зэрэгцээ санан дурсаж явах болно. Эгч минь амгалан нойрсоорой. Бид тандаа үүрд хайртай. Үүрд мөнх санан дурсана" гэжээ.
Барби Сюй нас барсан тухай мэдэгдлийн өмнөх өдөр хэвлэл мэдээллийн хэрэгслүүдээр "Гадаадын иргэнтэй гэрлэсэн тайвань алдартан 48 насандаа нас баржээ" гэх мэдээлэл цацагдаж эхэлсэн байна. Барби Сюй Өмнөд Солонгосын дуучин, дижэй, продюсер Кү Жүн-юптэй гэрлэсэн билээ. Барби Сюй өнгөрсөн сард Тайванийн телевийн продюсер Ван Вей-чунгийн охины хуриманд оролцож, эрүүл саруул харагдаж байсан тул хүмүүс эхэндээ энэ мэдээнд итгээгүй аж. Үүнээс өмнө арванхоёрдугаар сарын 31-нд Барби, Күү нар хүмүүст шинэ жилийн мэнд хүргэсэн зургаа цахим сүлжээндээ оруулж байжээ.
Гэр бүлийнхнээс энэ мэдээ үнэн эсэхийг тодруулах гэхэд хариу өгөөгүй тул цуу яриа үнэн байж магадгүй болжээ. Түүнчлэн Барби Сюйгийн салсан нөхөр, Хятадын бизнес эрхлэгч Ван Шиаофей цахим хуудасныхаа нүүр зургийг хар өнгөтэй болгон сольсон нь гашуудлын шинж тэмдэг гэж хүмүүс үзсэн байна.
Эх сурвалж: ytn
