27 жилийн дараа Сонгинохайрхан дүүргийн 5-р хороонд "Хүүхэд залуучуудын театр" үүд хаалгаа нээлээ.
1951 онд байгуулагдаж байсан Хүүхдийн төв театрыг 1967 онд Хүүхэд залуучуудын театр болгон үйл ажиллагааг нь өргөжүүлсэн түүхтэй бөгөөд 1997 оноос төрд ногдох хувьцааг худалдах нөхцөлөөр хувьчилж улмаар театр үйл ажиллагаагаа зогсоосон юм.
Тэгвэл өнөөдөр Сонгинохайрхан дүүргийн 5 дугаар хороонд байрлалтай Хүүхэд, залуучуудын театрын бүтээн байгуулалтын ажил дуусаж үүд хаалгаа нээлээ. Тус театр нь 760 хүний суудалтай, сүүлийн үеийн техник тоног төхөөрөмж бүхий, улсын жишиг театр болохоор зорилт тавин ажиллаж байна. Театр ийнхүү дахин хөшгөө нээхдээ залуучуудад зориулсан Төрийн шагналт, Соёлын гавьяат зүтгэлтэн Д.Батбаярын “Хайрыг хайрла”уянгын драмын жүжгээр хөшгөө нээж, “Арслан хүлэгт баатар” хүүхдийн жүжиг, “18 дахь хаврын хайр” уянгын драмын жүжгийг үзэгч олонд толилуулаа.
