1,250,000 ам.долларын шагналын сантай "Perfect World Shanghai Major 2024" тэмцээний хоёрдугаар шат буюу "Elimination Stage" эхэллээ.
Тус шатанд шалгарсан Ази-Номхон далайн бүсийн цор ганц төлөөлөл Монголын "The MongolZ" эхний тоглолтоо дэлхийн чансааг тэргүүлэгч "G2 Esports"-той хийж Inferno-д 13-10 харьцаагаар хожлоо. Монгол залуусын өөртөө итгэлтэй, тайван байдлыг тайлбарлагч нар бахдаж байсан бөгөөд энэ тэмцээнд түрүүлэх магадлалтай баг гэдгээ дахин баталлаа.
Ийнхүү тэд 1-0 амжилттай болсон ба өнөөдөр үдээс хойш дахин нэг удаагийн Bo1 тоглолтыг хийнэ.
G2 Esports Европын урьдчилсан шатнаас шууд Elimination Stage-д тоглох эрхээ авсан бол The MongolZ нэгдүгээр буюу Opening Stage шатанд гурав хожиж шалгарсан юм.
Хоёр баг энэ оны долоодугаар сард "Esports World Cup 2024" тэмцээний хүрээнд учраа таарахад Януш "Snax" Погорцелски ахлагчтай Европын баг 2-0 (Inferno 16-13, Ancient 13-11) харьцаагаар хожиж байв.
Elimination Stage-д Европын урьдчилсан шатнаас шууд эрхээ авсан найман баг болон Opening Stage-ээс эрхээ авсан найм нийт 16 баг оролцож байна. Тэднээс хамгийн түрүүнд гурав хожсон найман баг playoffs-т шалгарах бол гурав хожигдсон найман баг тэмцээнийг орхино.
Дараагийн шатанд шалгарах болон хэн хасагдахыг шийдэх тоглолтууд Bo3 журмаар болох ба бусад тоглолтууд Bo1 журмаар болно.
