Умард Солонгос пүрэв гаргийн өглөө тив алгасах баллистик пуужин харвасныг Өмнөд Солонгос болон Японы талаас мэдэгдлээ.
Пуужинг орон нутгийн цагаар 07:10-т харваж, 08:40-ийн үед Японы тэнгист унасан байна.
Энэ нь урьд өмнө Умардын харваж байсан пуужингуудаас хамгийн удаан хөөрсөн нь бөгөөд шинэ төрлийн пуужин байж магадгүйг Японы Батлан хамгаалахын сайд хэлэв.
Умард Солонгос ижил төрлийн пуужинг хамгийн сүүлд өнгөрсөн оны арванхоёрдугаар сард харвасан юм.
Лхагва гарагт Өмнөдийн талаас Умард Солонгосыг тив алгасах пуужингаа АНУ-ын Ерөнхийлөгчийн сонгуулийн үеэр буюу арваннэгдүгээр сарын 5-нд харваж магадгүй хэмээн анхааруулсан.
Умардыг ОХУ-д цэргүүдээ илгээснийг НАТО болон Пентагоноос баталж, олон улс уг үйлдлийг нь буруутгаж буй энэ үед ийн пуужин харвалаа.
Тодруулбал Өмнөд Солонгос болон АНУ Умардыг 11 мянган цэргээ дайнд оролцуулахаар Орос руу илгээж, тэдний 3000 нь фронтод ойртсон гэсэн юм.
