Олон улсын болон Монголын ахмадын өдрийг тохиолдуулан “АХМАДАА ДЭЭДЛЬЕ” нэгдсэн өдөрлөг “Хүүхэд, залуучуудын театр”-ын гадна талбайд өнөөдөр /2024.09.25/ боллоо. Тус арга хэмжээнд Сонгинохайрхан дүүргийн Засаг дарга Б.Хуягбаатар, Монголын ахмадын холбооны ерөнхийлөгч Ц.Сүхбаатар болон холбогдох удирдлагууд оролцож ахмадуудад баярын мэндчилгээ дэвшүүлэв. Энэ үеэр ахмадуудын хөгжлийг дэмжих төвүүдийн үйл ажиллагааг бодлогын хүрээнд дэмжин оёдол, гар урлалын цех, ахмадын бүтээлийн үзэсгэлэн, чийрэгжүүлэлтийн заал, сургалтын заал гэх мэт чөлөөт цагаа өнгөрөөх, нийгмийн оролцоог нэмэгдүүлэх, залуу үедээ ажил мэргэжлийн туршлагаа өвлүүлэх нөхцөлийг бүрдүүлэхээр анхаарч ажиллаж байгаагаа СХД-ийн Засаг дарга Б.Хуягбаатар хэллээ.
Тус арга хэмжээнд СХД-ийн 43 хорооны ахмадууд өөрсдийн тариалж боловсруулсан жимс, хүнсний ногоо, цагаан идээ болон гар урлалын бүтээлүүдээрээ үзэсгэлэн гаргаж оролцлоо. Мөн ахмад настнуудад төрийн үйлчилгээг ойртуулах, тэдний эрүүл мэндийг дэмжих, жижиг дунд үйлдвэрлэл эрхлэгч ахмадуудыг дэмжих зорилгоор холбоглох төрийн байгууллагууд иргэдэд зөвлөгөө, мэдээлэл хүргэлээ.
“АХМАДАА ДЭЭДЛЬЕ” өдөрлөгийн хүрээнд СХД-ийн ЗДТГ-аас өдөрлөгт оролцсон 3000 гаруй ахмадад зориулсан урлагийн үзүүлэх тоглолт, Тэтгэвэр, тэтгэмж, даатгалтай холбоотой мэдээлэл, сурталчилгаа явуулах асар, хүнсний аюулгүй байдлын шаардлага хангасан “STREET FOOD” болон худалдаа, үйлчилгээ явуулах орчин нөхцөлийг ханган ажиллав.
