Улаанхуарангийн 1.5 километр урт, дөрвөн эгнээ бүхий зам засварын ажил 90 гаруй хувьтай үргэлжилж байна. Аравдугаар сарын 7-ны 02:00-03:00 цагийн хооронд замын хөдөлгөөнийг нээнэ.
"Да хүрээ" зах өнөөдөр буюу Даваа гарагт амрах учир Эрдэнэтолгойн уулзвараас "МТ" ШТС-ын уулзвар хүртэлх авто замын ажил эхэлж байна. Тус зам нь 14 метрийн өргөнтэй, дөрвөн эгнээтэй бөгөөд засварын ажлыг аравдугаар сарын 7-8-нд хийж дуусгахаар төлөвлөсөн.
Эрдэнэтолгойн уулзварын замыг засаж дууссаны дараа аравдугаар сарын 8-нд Цагдаагийн гудамжны зам засварын ажил эхэлнэ. Ингэхдээ эхний ээлжид Оргил худалдааны төвөөс Хилчингийн уулзвар хүртэлх 800 метр, дараагийн ээлжид Хилчингийн уулзвараас Офицеруудын тойрог хүртэлх замыг засах юм.
Цаг агаарын нөхцөл байдалтай уялдуулан өдрийн цагаар замын хучилтын ажлыг хийж байгаа аж.
Өнөөдрийн байдлаар Улаанхуаран, Нарны замд Барс захын уулзвар, Хүннүгийн гудамжны урд талын замыг засаж дуусаж байна. Үргэлжлүүлэн Хүннүгийн гудамжны хойд талын замыг засна.
Нисэхийн тойргоос Архивын Ерөнхий Газар хүртэлх зам засварын ажил дуусаж, хөдөлгөөнийг нээхэд бэлэн болж байгаа.
