2020 он гарах шинэ жилээр тухайн үеийн ерөнхийлөгч байсан Х.Баттулга шинэ оны мэндчилгээ дэвшүүлэхдээ "Өчигдөргүй өнөөдөр, өнөөдөргүй маргааш гэж үгүй билээ. Туурга тусгаар Монгол Улсын хөгжил дэвшлийн төлөө залуу насаа зориулсан ахмад буурлуудаа өрийн дарамтаас салгах зорилгоор алдагдсан байсан Салхитын мөнгөний ордоо эдийн засгийн эргэлтэд оруулах замаар тэтгэврийн зээлийг нэг удаа тэглэх тухай Үндэсний Аюулгүй байдлын зөвлөлийн гишүүд санал нэгдэн шийдвэр гаргасныг он солигдох энэ мөчид ахмадууд та бүхэндээ дуулгаж байгаадаа баяртай байна" хэмээн мэдэгдэж, хундага өргөн баяр хүргэж байсан.
Нэг их наяд төгрөгийн баярын хундага буюу энэ хэмжээний өрийг тэглэх шийдвэрийг ахмад настангууд баярлан хүлээж авч байсан ч өнөө хэр нь энэ өр төлөгдөөгүй байгаа талаар УИХ-ын гишүүн П.Сайнзориг өнөөдөр мэдэгдлээ.
Тухайн үед ахмадын зээлийг төлөх эх үүсвэрийг Салхитын мөнгөний ордоос гаргуулна гэж байсан ч тухайн ордын байгаа нөөц болон үйл ажиллагаа нь нийт ахмадуудын өрийг төлж чадахааргүй байсан аж. Иймд 925.8 тэрбум төгрөгийн "Эрдэнэс бонд"-ыг гарган, баталгааг нь "Хөгжлийн банк"-аар гаргуулж энэ өр төлбөрийг Засгийн газар болон "Эрдэнэс Монгол" ХК хариуцах ёстой гэж хуулианд тусгасан байдаг.
Гэсэн ч өнөөдрийн байдлаар энэ өрнөөс нэг ч төгрөг төлөгдөөгүй, 1 их наяд орчим өр төлбөрийг хэн төлөх нь мэдэгдэхгүй компани хооронд шидэгдээд байж байгаа талаар УИХ-ын гишүүн П.Сайнзориг хэллээ.
