Ардчилсан нам Нийслэлийн иргэдийн төлөөлөгчийн хурал /НИТХ/-ын сонгуульд нэр дэвшүүлэх 44 хүнийхээ материалыг Нийслэлийн сонгуулийн хороонд хүргүүлсэн байдаг. Харин өнгөрөгч баасан гараг /2024.09.13/-т Нийслэлийн сонгуулийн хорооны шийдвэр гарч, АН-аас нэр дэвшигч Д.Мөнх-Эрдэнэ, Ц.Эрдэмбилэг нарыг НИТХ-ын 2024 оны сонгуульд нэр дэвшигчээр бүртгэхээс татгалзсан.
Иргэн Д.Мөнх-Эрдэнийг "биеэр эдлэх ял нь дуусаагүй гэх шалтгаанаар бүртгэхээс татгалзсан" бол Ц.Эрдэмбилэгийг "татварын өртэй" гэх шалтгаанаар бүртгэхээс татгалзсан юм.
Улмаар Нийслэлийн сонгуулийн хорооноос "татварын өртэй" гэх шалтгаанаар нэр дэвшигчээр бүртгэхээс татгалзсан хүмүүс энэ сарын 16 /2024.09.16/-ны дотор материалаа дахин өгөх боломжтой гэж мэдэгдсэн.
Тэгвэл өнгөрсөн хугацаанд Ц.Эрдэмбилэг "9000 төгрөгийн татварын өрийн асуудлаа шийдвэрлэсэн" тул түүнийг НИТХ-ын 2024 оны сонгуульд АН-аас нэр дэвшигчээр бүртгэж, иргэн "Д.Мөнх-Эрдэнийг нэр дэвшигчээр бүртгэхгүй" гэсэн өмнөх шийдвэрээ Нийслэлийн сонгуулийн хороо хэвээр үлдээжээ.
