Энэ сарын 8-11-ний хооронд Бээжин хотод болсон "Robot Challenge 2024" Олон Улсын Роботын Тэмцээнд Монгол улсын баг тамирчид амжилттай оролцож 2 алт, 5 мөнгө, 3 хүрэл медаль хүртлээ. Ингэснээр чансаагаараа гуравдугаарт эрэмбэлэгдэв.
Дэлхийн 31 орны 5000 гаруй тамирчид, 700 гаруй дасгалжуулагч, 300 гаруй байгууллага гурван өдрийн турш өрсөлдсөн энэхүү тэмцээний гурав дахь өдрийн төгсгөлд робот хөл бөмбөгийн төрлийн шөвгийн дөрөвт Монголын дөрвөн баг үлдэн, медалийн төлөө хоорондоо өрсөлдөж, бусад улсын оролцогчдыг алмайруулсныг тэмцээнд оролцогчид онцолж байлаа.
Тэмцээнд оролцогч багийн гишүүд болон багш дасгалжуулагчид энэхүү тэмцээний зардлыг хувиасаа гарган оролцож ийнхүү улс эх орныхоо нэрийг дуурсгажээ.
