Нийслэлийн ерөнхий боловсролын 5-р сургуулийн өргөтгөлийн ажил 2019 онд эхэлж, 5 жилийн хугацаанд гүйцэтгэгч тал болох “ПГС” ХХК нь 5.4 тэрбум төгрөгийн санхүүжилт авсан боловч одоог хүртэл уг барилгыг бүрэн ашиглалтад оруулаагүй байгаа юм.
Иймд Боловсрол, Шинжлэх ухааны сайд П.Наранбаяр өнөөдөр тухайн өргөтгөлийн барилгын явцтай танилцаж, гүйцэтгэгч компанийн төлөөлөлтэй уулзлаа.
Тэрбээр, Яамны зүгээс шаардлагатай төсөв, санхүүжилтийг цаг тухайд нь шийдвэрлэж ажилласан боловч барилгын үйл явц нь чамлалттай, дуусах хугацаа нь тодорхойгүй, ажил нь удаашралтай байгаа тул цаашид хамтарч ажиллах боломжгүй хэмээн үзэж гүйцэтгэгч компанитай байгуулсан гэрээг цуцлах шийдвэр гаргасан байна.
Мөн үлдсэн санхүүжилтийн эрхийг Чингэлтэй дүүргийн Засаг даргын Тамгын газарт шилжүүлж, дахин тендер зарлах, худалдан авах ажиллагааг шуурхай зохион байгуулж, 9-р сард багтаан өргөтгөлийн барилгыг ашиглалтад оруулахыг холбогдох албаныханд тус тус үүрэг болголоо.
