2024 оны УИХ-ын ээлжит сонгуульд нийслэлийн зургаан дүүргийн Засаг дарга өрсөлдсөнөөс дөрөв нь УИХ-ын гишүүн болж, парламентад суугаад буй. Тодруулбал, Хан-Уул, Сонгинохайрхан, Чингэлтэй, Сүхбаатар дүүргийн Засаг дарга нар УИХ-д сонгогдсон учир тэд орны хүнээ сонгох томилгооны ажил үлдээд байна.
Улмаар шинэ Засаг дарга нар орон нутгийн сонгуульд багаа авч орно. Тэгвэл нэрс эхнээсээ тодорчээ. Тодруулбал, Хан-Уул дүүргийн Засаг даргаар тус дүүргийн ИТХ-ын даргаар ажиллаж байсан, өдгөө Засаг даргын нэгдүгээр орлогч хийж буй Б.Цэрэн томилогдох аж.
Тэгвэл Баянзүрх болон Баянгол дүүрэгт УИХ-д сонгогдож чадаагүй хуучин дарга нар нь үргэлжлүүлэн албаа хаших сурагтай. Харин СХД-ийн хувьд ИТХ-ын дарга Б.Хуягбаатарын нэр яригдаж байна. Энэ бүгдийг эцэслэх хүн бол Хотын дарга Х.Нямбаатар. Хотын даргын захирамж гарснаар дүүргийн Засаг дарга нарын асуудал албажих юм.
