Хөлбөмбөгийн хорхойтон, спортын дэд мастер Б.Очирваань гэх залуу өөрийн мөрөөдлөө биелүүлж, шүтэн биширдэг "Манчестер юнайтед" багийнхаа тоглолтыг үзэхээр Монголоос Англи хүртэлх 14 мянган км замыг унадаг дугуйтай туулсан. Тэрээр энэхүү адал явдалт аяллаа 2023 оны тавдугаар сард Сүхбаатарын талбайгаас эхлүүлсэн бөгөөд энэ оны тавдугаар сарын 13-нд зорьсон билээ.
Бүтэн жилийн турш олон сорилт бэрхшээл, хүндрэл, адал явдлыг даван туулж зорьсон газраа хүрэхэд “Улаан чөтгөрүүд”-ийн алдарт тоглогч Рүүнитэй биечлэн уулзсан бөгөөд “Олд Траффорд” цэнгэлдэхэд тоглох мөрөөдлөө ч биелүүлээд амжсан. Түүний хүсэл мөрөөдлөө биелүүлсэн адал явдлыг дэлхий нийтээр бахдан магтаж, түүний тухай нийтлэл хөлбөмбөгийн ертөнцөд шуугиан тарьж, хүсэл мөрөөдөлтэй хүн бүхэнд Б.Очирваанийн хичээл зүтгэл зөв үлгэр дуурайлал болж чадсан юм.
Тэгвэл монгол дугуйчин Б.Очирваань өнөөдөр /2024.06.11/ эх орондоо ирлээ. Түүнийг угтаж монголын дугуйчид AIC STEPPE ARENA-д цугласан бөгөөд тэндээс хамтдаа дугуй жийж төв талбайн зүг ирж явна.
