Өчигдрийн ширүүн борооны өмнөх түр зуурын хүчтэй салхинд зургаан өрхийн гэр, нэг саравч нуржээ.
Тодруулбал, Төв аймаг, Жаргалант сум Баянбулаг багийн "Баянгол" гэдэг газар 06.06-ны өдрийн 17:00 цагийн орчим борооны өмнөх түр зуурын хүчтэй салхинд 6 өрхийн гэр, 1 малын саравч нурж, 1 худгийн дээвэр хууларсан байна. Энэ тухай мэдээлэл онцгой байдлын албанд тухайн өдрийн 21:13 цагт иржээ.
Энэхүү хүчтэй шуурганы улмаас Жаргалант сумын Баянбулаг баг дахь худгийн дээвэр, иргэн Б-ийн 4 ханатай 1 гэр, иргэн Б, А, А нарын 5 ханатай 3 гэр, иргэн Ц, Х нарын 6 ханатай 2 гэр, иргэн М-ийн 8х20 метрийн хэмжээтэй малын саравч тус тус нурсан тухай мэдээллийг тус сумын Засаг даргын Тамгын газрын дарга аймгийн Онцгой байдлын газарт мэдэгдсэн байна.
