Дотоодын цэргийн 05-р ангийн алба хаагч машинд дайруулж амиа алдсан харамсалтай хэрэг тавдугаар сарын 30-нд Төв аймгийн Цээл суманд 21.40 цагийн орчимд гарсан. Уг хэрэгтэй холбоотойгоор Хүний эрхийн Үндэсний комиссоос тус ангид хяналт шалгалт хийжээ.
Энэ талаар "Дотоодын цэргийн 05-р ангийн захирагч хувийн аж ахуйн нэгжтэй гэрээ байгуулсан байсан. Үүн дээр цэргүүдийг ажиллуулахаар авч явах үед тухайн үед тээврийн хэрэгсэл жоолоодож явсан компанийн ажилтан цэргийг дайрсан. Энэ асуудал гэмт хэргийн шинжтэй учраас Төв аймгийн цагдаагийн газар шалгаж байна. Ээлжийн ахлах, хамт ажилласан цэргүүдтэй уулзаж, ярилцсан. Хүний амь нас хохирсон гэмт хэрэг учраас хэн нь буруутайг цагдаагийн байгууллага тогтооно. Цэргийн ангийн дотоод аж ахуйн ажил биш ААН-тэй байгуулсан гэрээний үндсэн дээр ажиллаж байсан" гэх мэдээллийг өглөө.
Эргэн сануулахад: Хэрэг гардаг өдөр нэг ахлагч, 8 хугацаат цэрэг ажилд явсан байна. Талийгаач 2023 оны хоёрдугаар ээлжээр цэргийн албанд татагджээ. Тус ангиас талийгаачийн ар гэртэй нь уулзсан бөгөөд ахлагчийн дундаж цалингийн 5 жилийн цалинтай тэнцэх хэмжээний нэг удаагийн тэтгэмжийг олгох талаар мэдэгдсэн байна.
