СОНСГОЛ: МОНГОЛЫН ХАМГИЙН ОЛОН АШИГТ МАЛТМАЛЫН ЛИЦЕНЗ ЭЗЭМШДЭГ КОМПАНИУДЫГ МАК ХХК ТЭРГҮҮЛЖ БАЙНА

Лицензийн нээлттэй сонсгол Ашигт малтмалын лизенз олгох, шилжүүлэх асуудлаар үргэлжилж байна.

Энэ үеэр хамгийн олон лиценз эзэмшиж буй ААН болон хувь хүнийг шинжээчийн мэдээлэлд үндэслэн нэрлэлээ.

Энэ жагсаалтыг ААН-ээс МАК, хувь хүнээс Н.Нямтайшир болон түүний гэр бүл тэргүүлж байна.

МАК-ийн хувьд хайгуулын 7, ашиглалтын 19 буюу нийт 26 тусгай зөвшөөрөл эзэмшдэг. Харин шинжээчид МАК-аас гадна "МАК цемент"-ийн ордыг хамтатган тоолж, хамаарал бүхий компаниудаараа нийт 41 лиценз эзэмшдэг гэдгийг тодотгов.

Харин, МАК-ийн хувьцаа эзэмшигчид Монголын хамгийн олон лиценз эзэмшдэг хувь хүн болж нэрлэгдлээ. Тодруулбал,

• Б.Нямтайшир - 41
• Түүний эхнэр Д.Хулан - 40
• Хүү Н.Номтойбаяр - 40
• Охин Н.Цэлмүүн - 40
• Хүү Н.Мөнгөншагай - 40 тусгай зөвшөөрөл эзэмшиж байна. /Эдгээр нь давхардсан тоо юм./

Шинжээчийн хувьд "Нэг компани хамаарал бүхий хуулийн этгээд, охин компаниар дамжуулж, хэд хэдэн лиценз эзэмшиж байна. МАК-ийн хувьд хамаарал бүхий гурван ААН-тэй, тэдгээрийн лицензийг нэгтгэвэл 41 байна" хэмээн тодотгосон юм.

Харин хамгийн их талбайтай лиценз эзэмшдэг компаниудыг Цайна инвестмент Монголиа ХХК тэргүүлж, МАК удаах жагсаалтад нэрлэгдлээ.