2024 оны УИХ-ийн сонгуульд нэр дэвшигчид маргаашнаас эхлэн тодорхой болно. Өөрөөр хэлбэл сонгуульд оролцохоор бүртгүүлсэн нам, эвсэл нэр дэвшүүлэх ажиллагааг санал авах өдрөөс 45 хоногийн өмнө эхлүүлж, долоо хоногийн хугацаанд дуусгана гэж сонгуулийн тухай хуулийн 29 дүгээр зүйлийн 29.1-д заасан байдаг. Хуулийн хугацааны дагуу 5 дугаар сарын 14-өөс 20-ныг дуустал нэр дэвшүүлэх үйл ажиллагаа явагдана.
Энэ удаагийн сонгуульд 23 нам, хоёр эвсэл, 77 бие даагч оролцохоор бүртгүүлээд буй. Сонгуулийн бэлтгэл ажлын хувьд 330 сум, аймаг, нийслэлд сонгуулийн хороо байгуулагдсан. Нийтдээ 2,196 хэсэг байх бөгөөд маргааш гэхэд сум, дүүргийн сонгуулийн хэсгийн хороог байгуулж дуусах юм байна.
Энэ удаа бид 126 гишүүн сонгох учиртай. Үндсэн хуульд зааснаар Улсын Их Хурлын 126 гишүүний 78 гишүүнийг сонгуулийн тойргоос олныг төлөөлөх (мажоритор), 48 гишүүнийг хувь тэнцүүлэн төлөөлөх (пропорционал) аргаар сонгоно. Үүнтэй холбоотой саналын хуудас тухайн тойргийн мандатын тоогоор нэр дэвшигч сонгох болон нэг нам, эвсэл сонгох хоёр хэсэгтэй байна
