Энэ парламентын отгон чуулганаар олон хуулийн төслийг хэлэлцэхээр байгаа ч УИХ-ын гишүүд тойрогтоо ажиллаж байгаа гэх шалтгаанаар ирц бүрдэхгүй байнгын хороодын хуралдаанууд цуцлагдаж, чуулганы ирц дөнгөж бүрдэх төдий л хуралдаж байсан.
Иймд УИХ-ын дарга Г.Занданшатар чуулганы хуралдаанаар яаралтай хэлэлцэх асуудлуудыг шуурхайлж, 5 сарын 6-наас 13-ныг хүртэл чуулганы хуралдааныг завсарлуулсан.
Энэ хугацаанд гишүүд өнгөрсөн дөрвөн жилийн ажлаа тайлагнан тойрогтоо ажиллаж, сонгогчдод хайр зарлан, эх орондоо хайртай улс төрчийн дүрд тоглоод амжив. Олон эрээн мяраан хуудас бүхий сэтгүүлүүд ч айл бүрийн үүдэнд хүргэгдэн, эхнээсээ хогийн саванд хаягдаж буй дүр зураг цахим орчинд тархлаа.
Ямартаа ч хийсэн ажлаа тайлагнаг гэж чөлөөлсөн завсарлага өнөөдөр /2024.05.13/ дуусч гишүүд ажилдаа орох учиртай. Намын бүлгүүд хуралдаж, энэ долоо хоногт байнгын хороод, чуулганаар хэлэлцэх асуудлаар байр сууриа нэгтгэнэ.
