ТҮК-ийн ажилтнуудын хогийн шүүр дахин барихгүй, орчин үеийн техник технологийг ажилдаа Ашиглана гэж хотын Дарга Х.Нямбаатар өнгөрсөн сард мэдэгдэж байв. Тэгвэл цэвэрлэгээний уг төхөөрөмж ирж, өнөөдөр хуваарилжээ.
Авто замын хөвөө, явган хүний зам, гудамж талбай, цэцэрлэгт хүрээлэн зэргийг цэвэрлэхэд ашиглах эхний ээлжийн 20 ширхэг төхөөрөмжийг УСУГ, ГУББ, Хот Тохижилтын газар, ОСНААУГ, ХИХУГ зэрэг байгууллагад хүлээлгэн өгсөн байна.
Тус төхөөрөмж нь Турк улсад үйлдвэрлэгдсэн, 240 литрийн багтаамжтай хог хуримтлуулагч савтай, 7 км/цагийн хурдтай, нэг цэнэглэлтээр 6-8 цаг ажиллах хүчин чадалтай бөгөөд орчныг бохирдол үүсгэлгүйгээр цэвэрлэх юм байна. Нийт 53 ширхгийг захиалснаас 20 нь иржээ. Мөн “АОДЭ” ХХК-аас "Howo" брэндийн өөрөө буулгагч 12 ширхэг автомашиныг НЗДТГ-т хүлээлгэн өгсөн байна. "Синотрак" үйлдвэрийн 2024 онд үйлдвэрлэсэн уг автомашин нь Евро-5 стандарт бөгөөд 400 морины хүчин чадалтай аж.
