Монголын оюутны спортын VI наадам энэ сарын 15-25-ны өдрүүдэд Улаанбаатар хотноо болно.
Уг наадамд нийт 34 их дээд сургуулийн 2400 гаруй оюутан, тамирчид спортын арван төрлөөр өрсөлдөх юм. Мөн энэхүү наадмын жүдо, сагсан бөмбөгийн төрлүүдэд үндэсний шигшээ багийн тамирчдын 70 гаруй хувь оролцоно гэсэн судалгаа гарчээ.
Наадмын бэлгэдлээр зөвхөн Монгол Улсад байдаг "Мазаалай" баавгайг сонгосон нь спортын наадмаар дамжуулж мазаалайг хайрлаж хамгаалах, тоо толгойг нэмэгдүүлэхэд нийгмийн анхаарлыг хандуулах зорилготой.
Наадам волейбол, гандбол, жүдо, сагсан бөмбөг 5х5, таеквондо, футзал, чирлидинг, чөлөөт бөх, шатар, ширээний теннисний 10 спортын төрлөөр явагдана. Наадмын шигшээ тэмцээнүүд явагдах хуваариуд батлагдсан ба спортын 10 заал, танхим, спортын ордонд явагдахаар гэрээ хийгдэн, спортын тэмцээнийг явуулах 10 спортын холбоодтой гэрээ байгуулсан байна.
Мөн наадмын нэгдсэн болон төрөл тус бүрийн техникийн зөвлөгөөнүүд явагдаж эхлэн, багийн сугалаа хийгдэж, тоглолтын хуваариуд гарчээ.
