Хан-Уул дүүргийн 8 дугаар хорооны нутаг дэвсгэр “Чингис хаан” олон улсын нисэх буудал хүртэлх тууш зам руу орох хэсэгт 17 хүртэлх тооны автомашин мөргөлдсөн ноцтой осол гарчээ. Үүнээс болж хөшгийн хөндийн хурдны замын хөдөлгөөн хаагдаад байна. Яг одоо уг осол дээр тээврийн цагдаагийн албанаас шалгалтын ажиллагааг явуулж байна.
Цаг агаарын нөхцөл байдлаас шалтгаалж, үзэгдэх орчин хязгаарлагдмал болох, замын зорчих хэсэгт халтиргаа, гулгаа үүссэн нөхцөл байдалтай байх тул жолооч та бүхэн:
Тохиромжтой хурдыг сонгох: Хажуу, хоорондын зайг зөв барьж явах; Хөдөлгөөн эхлэх, чиг өөрчлөн байрлан явах үйлдлийг зөв гүйцэтгэх; Аюул бүхий хэсэгт гүйцэх, гүйцэж түрүүлэх үйлдлийг хийхгүй байх; Шил арчуур, цан үлээгүүр зэрэг техникийн бүрэн байдлыг хангасан байх; Зайлшгүй зогсолт хийсэн тохиолдолд бусдад анхааруулах, аюулгүй байдлыг бүрэн хангаж хөдөлгөөнд оролцохыг зөвлөж байна.
Зам тээврийн ноцтой осол гарсантай холбоотойгоор МИАТ компани мөн мэдэгдэл гаргаж, нисэх буудал руу явж байгаа иргэдийг Төв аймгийн замыг сонгон очихыг зөвлөсөн байна.
