Засгийн газрын өнөөдрийн хуралдаан өндөрлөлөө. Хуралдаанаас гарсан шийдвэрийг ЗГХЭГ-ын дарга Д.Амарбаясгалан танилцуулж мэдээлэл өглөө.
Энэ үеэр “2024 оны цас, зудын нөхцөл байдал улс орон даяар хүндрэл бэрхшээл авчирж байна. Малжуулах хөтөлбөр Засгийн газрын өмнө тулгамдсан асуудал байна.
Өнөөдрийн байдлаар Монгол Улсад 6 орчим сая мал хорогдсон мэдээлэл байна. 20 орчим сая мал хорогдож болзошгүй гэсэн урьдчилсан дүгнэлтийг Онцгой байдлын газраас гаргасан. Хэрэв энэ тоо үнэн бол айл өрх малгүй болох эрсдэл үүснэ. Тэгэхээр Малжуулах хөтөлбөрийг өрнүүлнэ.
Малгүй болсон малчин өрхийг малжуулахын тулд 5-8 сая төгрөгийг хүүгүй урт хугацааны зээл байдлаар өгөхөөр зорин ажиллаж байна. Энэ дагуу ирэх долоо хоногт малжуулах асуудлыг УИХ-аар хэлэлцэнэ. Долоон заалттай, нэг удаагийн хуулийн төсөл хэлэлцэгдэнэ” гэж онцлов.
