Нийслэлийн МАН-ын хорооны тэргүүлэгчид өчигдөр /2024.03.11/ хуралдаж, УИХ-ын сонгуулийн Нийслэлийн МАН-ын хорооны штабын даргаар Д.Сумъяабазарыг, Ерөнхий менежерээр Х.Нямбаатарыг сонгосон. Мөн уг хуралдаанаар УИХ-ын гишүүн асан, Нийслэлийн МАН-ын тэргүүлэгч Т.Аюурсайханыг тэргүүлэгчээс чөлөөлсөн байна.
Учир нь тэрээр "Нүүрсний" гэх хэрэгт холбогдож, улмаар өнгөрсөн нэгдүгээр сард шүүхээс гурван жилийн хорих ял сонсож өдгөө хорих 461 дүгээр ангид ялаа эдэлж байгаа билээ.
Т.Аюурсайхан анх нүүрсний хэрэгт холбогдсон даруйдаа УИХ-ын гишүүнээсээ чөлөөлөгдсөн. Үүний дараа түүнийг Чингэлтэй дүүргийн МАН-ын хорооны даргаас чөлөөлж, Н.Батсүмбэрэлийг оронд нь сонгосон байдаг. Тэгвэл өчигдөр хуралдсан Нийслэлийн МАН-ын тэргүүлэгчдийн хуралдаанаар Т.Аюурсайханыг тэргүүлэгчээс чөлөөлж, Н.Батсүмбэрэлийг тэргүүлэгчээр сонгосон байна.
