Цагдаагийн ерөнхий газраас автомашинаа асаалттай түр орхиж хулгайд алдах асуудал ихээр гарч байгаатай холбогдуулан сэрэмжлүүлэг хүргэж байна. Хүмүүс ихэвчлэн дэлгүүр орох, сургууль цэцэрлэг орох, орон сууц хашааныхаа гадаа түр халааж орхих зэргээс болж энэ төрлийн гэмт хэрэг газар авч байна. Сүүлийн тохиолдлыг дурдвал, цагдаагийн байгууллагад Хэнтий аймгийн Хэрлэн сумын нутаг дэвсгэрт гуравдугаар сарын 6-нд “Тоёота Приус-30” маркийн тээврийн хэрэгсэл асаалттай байсан нь хулгайд алдагдсан тухай дуудлага, мэдээлэл бүртгэгджээ.
Дээрх хэргийг тус аймгийн харьяат О гэгч үйлдсэн болохыг олж тогтоон, автомашинийг хохирогчид хүлээлгэн өгч, шалгалтын ажиллагааг үргэлжлүүлж байгаа аж.
Иймд иргэн, жолооч та бүхэн автомашинаа асаалттай орхихгүй байж, сонор сэрэмжээ дэшлүүлж, тусгай зориулалтын камержуулсан зогсоолд автомашинаа байрлуулж, энэ төрлийн гэмт хэргээс урьдчилан сэргийлэхийг зөвлөж байна.
