Соёлын сайд Ч.Номин Соёлын өвийн төвийн захирал Г.Энхбатыг Монголын үндэсний музейн захирлаар давхар томилсон нь музейн хамт олны эсэргүүцэлтэй тулаад буй. Тодруулбал Ч.Номин сайд Үндэсний музейн захирлын сонгон шалгаруулалт зарлалгүйгээр өөр байгууллагын захирлыг энэ албыг хавсран удирдуулахаар шийдвэрлэсэн юм. Түүний энэхүү хууль бус захирлын томилгоог эсэргүүцэж байгаагаа музейн ажилчид илэрхийллээ.
Тэдний зүгээс 2023 оны арваннэгдүгээр сарын 8-нд Соёлын сайд Ч.Номин музейн ажилтан Д.Мөнхтогоог музейн захирлын албыг түр орлон гүйцэтгэгчээр томилсон. Гэвч дахин тушаал гаргаж, Соёлын өвийн төвийн захирал Г.Энхбатыг ямар нэгэн сонгон шалгаруулалт хийхгүйгээр түр орлонг түр орлонгоор томилох тушаал гаргасан нь хууль зөрчиж байна гэв.
Мөн ажилчдын албан хүсэлтийг үл ойшоож, музейд хяналт шалгалт оруулсан байна. Энэ үеэрээ ажилчдыг байцаах хэлбэрээр мэдээлэл авсан нь хууль зөрчиж байна гэдгийг онцолсон юм.
