Дэлхийд 10-т, Азид нэгт эрэмбэлэгддэг Энэтхэгийн тэрбумтан Мукеш Амбанигийн эхнэр Нита Амбанигийн маргад зүүлт ойрын хэдэн өдрийн том сенсаац болж байна. Хэвлэлүүд түүнийг "Тоосгон маргад зүүлээ" гэж хүртэл тоглоом шоглоом болгон бичжээ. Энэ зүүлтээ тэрээр сая 3-р сарын 1-нээс 3-ны хооронд болж өнгөрсөн бага хүүгийнхээ хуримын өмнөх ёслолын нэгээхэн хэсэг арга хэмжээн дээр зүүжээ. 50 орчим сая доллар буюу 200 шахам тэрбум төгрөгийн үнэтэй зүүлт аж.
120 сая долларын өртгөөр бүтсэн тэдний бага хүү Анант Амбанигийн хуримын өмнөх ёслол үнэндээ л дэлхий нийтийг алмайруулж чадлаа.
"Хурим нь ч биш, хуримын өмнөх ёслол шүү дээ" гэж дэлхий нийт шагширч байна. Дэлхийн хамгийн үнэтэй хуримуудад Мукеш Амбанигийн охин Ишагийн хурим, Энэтхэгийн өөр нэг тэрбумтан Лакшми Митталын охины хурим, Арабын Эмиратын анхны ерөнхийлөгчийн хүү шэйх Мухаммед бин Рашидын хурим зэрэг хуримууд багтдаг байна. Эдгээрээс хамгийн өндөр өртөгтэй нь Арабын шэйх Мухаммед бин Рашидынх бөгөөд 137 сая доллар зарцуулсан гэнэ.
Харин Амбанигийн бага хүү Анантын хуримын өмнөх ёслол л гэхэд 120 саяаар бүтсэн гэхээр жинхэнэ хурим нь хэдийн өртөгтэй байх бол гэдэг таамаг хэдийнээ яваад эхэлжээ. Ирэх долдугаар сарын 12-нд жинхэнэ хурим нь болох юм.
