Хөвсгөл аймгийн Цагаан нуур суманд “Цааны баяр-2024” соёлын наадам эхэллээ. Энэхүү баяр нь Хөвсгөл аймгийн 6 дахь хошуу мал цаа, цаатан иргэдийн аж амьдралыг олон нийтэд сурталчлан таниулах зорилготой юм.
Цааны баяр өнөөдөр, маргааш болох бөгөөд өнөөдөр нутгийн ардын тува, дархад дууны уралдаан, бөөгийн бүжгийн уралдаан, цааны уралдаан, цаатай хос шалгаруулах тэмцээн, албан байгууллага, үзэгч, жуулчдын дунд буухиа тэмцээн болно. Мөн “Бүрэн дэглэлтэй” урц шалгаруулж, соёлын бүтээлч үйлдвэрлэл эрхлэгчдийн үзэсгэлэн худалдаа зохион байгуулж, гар урлалын бүтээлээ олон нийтэд сурталчлах ажээ.
Өнөөдрийн байдлаар Цагааннуур сумын баруун, зүүн тайгад 200 гаруй иргэн цаа маллан амьдарч байна. Өнгөрсөн оны жилийн эцсийн мал тооллогоор 2928 толгой цаа тоолуулж, өмнөх оноос 388 толгойгоор өсжээ.
