Өнгөрсөн онд болсон үерээр ”S’Outlet” дэлгүүрийн хэсэгт ус боогдсоноос үер хоёр тийш хальж, ойр орчмын иргэдийн эд хөрөнгөд хохирол учруулсан.
Үерийн далан сувгийг тэлээгүй, үйлчилгээ засвар хийгээгүй, даланд бургас болон шороо асгаснаас болж үерийн асуудлууд бий болсон гэж үздэг. Тиймээс ”S’Outlet” дэлгүүрийн агуулахуудыг буулгасан. Тэгвэл одоо таван давхар дэлгүүрийн хүчитгэсэн бетон хийцтэй барилгыг дотроос нь буулгаж байна. Үүнтэй холбоотойгоор ”S’Outlet” дэлгүүрийн дулаан, цахилгаан, бохир, цэвэр усны инженерийн хангамжийг зогсоожээ. Уг барилгыг дөрөвдүгээр сард буулгаж дуусгахаар төлөвлөсөн байна.
Мөн дэлгүүрийн хажуугийн үерийн далангийн сувагчлалыг нээхээр өнөөдрөөс ажиллаж эхэллээ.
Дөрөвдүгээр сарын дунд үеэс тавдугаар сарын эхэн үеийн хооронд шар усны үер болох магадлалтай гэсэн учир үерийн далангийн сувагчлалыг хийж байгаа аж.
Барилгуудыг буулгасны дараа үерийн далан сувгийг ухаж, хогийг цэвэрлэнэ. Ингэснээр ус нэвтрүүлэх чадвар өндөр болж, үерийн далан суваг бүрэн ажиллана гэж албаны эх сурвалж мэдэгдлээ.
