Гитарчин, ая зохиогч Д.Өлзий-Орших өөрийн Номинталст хамтлагт зориулан зохиож өгсөн дуунуудаа дуучин Хаянаа, Дээгий нараар дуулуулахгүй гэж байсан цаг саяхан. Тэгвэл өнгөрсөн баасан гарагт гитарчин Өөжгий Сүхбаатарын одонгийн найраа төрсөн өдөртэйгөө хамтатган тэмдэглэж рок попын оддыг нэг дор цуглуулан назгай найрлах үеэрээ Хаянаа Дээгий нартай ярилцан ойлголцож, цаашид номинталстын супер хитүүдийг тэднээр дуулуулахыг зөвшөөрчээ.

Тэрээр энэ талаараа өнөөдөр өөрийн цахим хуудсаараа зарлан, "Дуулаа дуул 2 лүд минь. Дуулим хорвоод дуулж болж л байвал миний муусайн дуунуудыг Монголд дуул, Японд дуул, Америкт ч дуул..." хэмээн Хаянаа Дээгий нарын толгой мэхийн зогсож буй зургийн хамт нийтэлсэн. Үүнтэй зэрэгцээд тэрээр 3 дугаар сарын 7-нд тоглолт зохион байгуулах гэж буйгаа ч зарлаад амжсан.

Харин Номинталст хамтлагийн дуучин А.Хаянхярваа: Хэний ч өмнө, юуны ч өмнө гудайж үзээгүй толгой минь Уран бүтээлийнхээ төлөө анх удаа..Ийм л юм болсон доо хэмээжээ. 

Ямартаа ч Номинталстын супер хитүүд ахин тэдний хоолойгоор эгшиглэх нь.