Булган аймгийн Баяннуур сумын ерөнхий боловсролын сургуулийн зарим сурагчид зудын нөхцөл байдалтай холбоотойгоор хичээлдээ ирэх боломжгүй болжээ. Тодруулбал, нийт 23 сурагч сар шинийн баярын дараа зудаас болж зам хаагдсаны улмаас хичээлдээ ирж чадахгүй байна.
Иймд Боловсрол, шинжлэх ухааны сайдаар ахлуулсан ажлын хэсэг өчигдрөөс /02.19-өөс/ зам, давааг нээх ажлыг шуурхай эхлүүлж, 2-7 хоногийн дотор хүүхдүүдийг сургуульдаа явах боломжоор хангахаар төлөвлөн ажиллаж байгаа аж.
Баяннуур сумын ерөнхий боловсролын сургуулийн дотуур байр 50 хүүхдийн хүчин чадалтай. Одоогоор 71 хүүхэд амьдарч байна. Мөн байранд орох хүсэлт гаргасан 27 хүүхэд ахиад байгаа ч тэднийг авах боломжгүй байна. Иймд 100 хүүхдийн дотуур байртай болох хүсэлтийг Салбарын сайддаа уламжиллаа.
Цэцэрлэгийн хувьд 130 хүүхэд бүртгэлтэй. Цас зуд ихтэй, хүйтний эрч чангарч байгаатай холбоотойгоор хүүхдийн ирц бага байгаа ч хичээл сургалтын үйл тасралтгүй үргэлжилж байна.
