Монгол Улсын 15-69 насны хоёр хүний нэг нь илүүдэл жин, таргалалттай, гурван хүн тутмын нэг нь халдварт бус өвчнөөр өвдөх эрсдэлтэй байна гэсэн судалгаа байдаг. Тиймээс таргалалтыг бууруулах нь улс орны хэмжээнд анхаарал татсан асуудал болжээ.
Хүн өндөртөө таарсан жинтэй байх ёстой. Биеийн жингээ хянах хэд хэдэн арга бий. Тухайлбал бүсэлхийн тойргийн хэмжээ нь өөрийн өндрөөс эмэгтэй хүн 80 см-ээс бага, эрэгтэй хүн 90 см-ээс бага бол өөрийгөө хэвийн байна гэж дүгнэж болдог аж. Эсвэл 40-өөс дээш настай хүн өөрийн өндрөөс 110-ыг, 40-өөс доош настай бол өндрөөсөө 100-г хасаад хэвийн жингийн хэмжээгээ мэдэж ч бас болох юм.
Өндөртөө таарсан жинтэй байхын тулд хоолоо тохируулах, дасгал хөдөлгөөн хийх шаардлагатай ч хүмүүс тэр бүр хэрэгжүүлээд байж чададгүй. Удахгүй болох цагаан сараар дийлэнх хүмүүс жингээ нэмчихгүй юмсан гэж хичээж байгаа нь лавтай.
Монгол эрэгтэй хүн өдөрт дунджаар 2500 Ккал, эмэгтэй хүн 2200 Ккал илчлэгтэй хоол хүнс хэрэглэхэд зохистой гэж үздэг байна.
Цагаан сараар өдөрт гурван айлаар шинэлж, нэг айлд дунждаар гурван бууз, хэрчим мах, сүүтэй цай, нийслэл салат идэхэд дунджаар 4000 Ккал орчим илчлэг авна гэсэн судалгааны дүн бий. Энэ 4000 Ккал илчлэг 420 грамм өөх болж биед хуримтлагддаг байна. Тиймээс алхах, гүйх зэргээр илчлэгийг шатаах дасгал хөдөлгөөн хийх, ногоон ургамал бүхий салат идэх зэргээр эрүүл мэндээ хамгаалаарай.
