Орон нутгийн замд халтиргаа гулгааг тооцоолон, хурдаа тохируулан яваагүйгээс үүдэж жижиг тэрэг том машины араас орсон осол нэг шөнийн дотор хоёр удаа гарсан байна. Тодруулбал
Дорнод аймаг, Баянтүмэн сум Цагаандэрс багийн “Цагдаагийн пост” гэдэг газар Баянтүмэн сумаас Хэрлэн сумын чиглэлд зорчиж явсан “Королла фиэлдер” загварын суудлын автомашин, ачааны автомашины хойд талаас мөргөж, суудлын автомашины жолооч Б /36 настай, эрэгтэй/ бүхээг дотроо хавчуулагдан газар дээрээ нас баржээ.
Мөн өнгөрөгч шөнө Дорноговь аймаг, Эрдэнэ сум Еншөөв багийн “Хамрын-Энгэр” гэдэг газар Улаанбаатар хотоос Замын-Үүд сумын чиглэлд зорчиж явсан “Хьюндай сонота-6” загварын суудлын автомашин, ачааны автомашины хойд талаас мөргөж, суудлын автомашины бүхээгт 1 хүн хавчуулагдсан ч азаар хүний амь эрсдээгүй байна.
Иймд жолооч та бүхэн тээврийн хэрэгслийнхээ бүрэн бүтэн байдлыг хангаж, халтиргаа гулгааг тооцоолон хурдаа тохируулж, анхаарал болгоомжтой замын хөдөлгөөнд оролцохыг анхааруулж байна
