Мөнгөн зээлийн үйл ажиллагааг зохицуулах тухай хууль 2022 оны 11 дүгээр сарын 4-ний өдөр батлагдаж 2023 оны 3 дугаар сарын 1-ний өдрөөс хүчин төгөлдөр мөрдөгдөж эхэлсэн. Хууль хэрэгжээд яг нэг жил болж байна. Энэ нэг жилийн хугацаанд барьцаалан зээлдүүлэх үйлчилгээ эрхлэгчид буюу ломбард ажиллуулдаг хүмүүс харъяа төрийн байгууллагатаа албан ёсны бүртгэлээ хийлгэх үүрэг хүлээсэн. Энэ хугацаанд бүртгэлээ хийлгээгүй ломбардууд үйл ажиллагаагаа эрхлэх боломжгүй болж байгаа.
Монгол Улсад 1000 гаруй ломбард үйл ажиллагаагаа явуулдгаас хууль хэрэгжсэн нэг жилийн хугацаанд ердөө 24 нь л харъяа байгууллагатаа бүртгэлээ хийлгэжээ. Харин бүртгэлээ хийлгээгүй барьцаалан зээлдүүлэх үйлчилгээ эрхлэгчид өнөөдрөөс эхлээд үйл ажиллагаа явуулах боломжгүй болж байна.
Мөн энэ хуулийн хүрээнд яригдах өөр нэг асуудал нь зээлийн хүүгийн тааз. СЗХ-ны дэргэдэх Мөнгөний зээлийн бодлогын зөвлөл хэлэлцээд хүүгийн таазыг 4,5 хувиар тогтоож өгсөн байна.
Ингэснээр өнөөдрөөс эхлээд ломбардуудын хүүгийн дээд хэмжээ 4,5 хувиас хэтрэхгүй байх зохицуулалт мөрдөгдөж эхэлж байна. Хэрвээ энэ хуулийг мөрдөн ажиллахгүй бол ломбардуудад зөрчлийн хуулиар торгууль ногдуулах бөгөөд зээл авсан иргэд зээлийн хүүгийнхээ 4.5-аас хэтэрсэн хэсгийг төлөхгүй байх эрхтэй болох аж.
Энэхүү хүүгийн тааз нь бага мөнгөөр эргэдэг ломбардуудад хүндээр тусч байгаа учир үүдээ барихад хүрээд байгаа аж. Энэ талаарх сурвалжлагыг ЭНД дарж үзнэ үү.
