#СБД 11, 12, 13, 16, 17, 18, 19 ДҮГЭЭР ХОРООНД ЖАЙКА ОЛОН УЛСЫН БАЙГУУЛЛАГАТАЙ ХАМТРАН ХӨДӨЛМӨР ЭРХЛЭЛТИЙГ ДЭМЖИХ ТӨСЛИЙГ ХЭРЭГЖҮҮЛНЭ
Сүхбаатар дүүргийн 11, 12, 13, 16, 17, 18, 19 дүгээр хороонд ЖАЙКА Олон Улсын байгууллагаас “Монгол улсын зорилтот бүлгийн иргэдийн хөдөлмөр эрхлэлтийг дэмжих замаар бие даан амьдрахад нь дэмжлэг үзүүлэх тогтолцоог бүрдүүлэх төсөл”-ийг хэрэгжүүлнэ. Өнөөдөр уг төслийн хүрээнд танилцуулах сургалтыг сонгогдсон хорооны Засаг дарга, Нийгмийн ажилтан, хэсгийн ахлагч нар болон төсөлд дэмжлэг үзүүлэх Ажлын хэсгийн гишүүдийг хамруулан зохион байгууллаа. Сургалтыг нээж дүүргийн Засаг даргын орлогч хэлсэн үгэндээ “Зорилтот бүлгийн иргэдийн хөдөлмөр эрхлэлтийг дэмжих замаар бие даан амьдрахад нь дэмжлэг үзүүлэх тогтолцоог бэхжүүлэх энэ төслийг орон нутагтаа амжилттай хэрэгжүүлэхийн тулд салбар бүрийн төлөөллийг оролцуулсан ажлын хэсгийг байгуулсан. Ингэснээр салбар хоорондын уялдааг хангах, төсөлд хамрагдах иргэнийг зөв сонгох, цаашлаад тогтвортой ажиллах хүртэл бүх талын дэмжлэгийг үзүүлэх юм” гэдгийг онцлов. Мөн энэ үеэр төслийн ахлах зөвлөх Чиба Хисао “Төслийн үйлчилгээний зөвлөхөөс тухайн иргэний гэр бүл, хөдөлмөр эрхлэлтийн нөхцөл байдалд үнэлгээ хийж, түүн дээр үндэслэн төлөвлөгөө боловсруулна. Аж ахуй нэгж дээр ажил туршихаар очихын өмнөх суурь сургалтуудыг танхимаар зохион байгуулж, хэд хэдэн ажил олгогч дээр туршсаны дараа иргэн өөрт тохирсон ажлын байрандаа зуучлуулна. Энэхүү дэмжлэг тогтвортой ажиллах хүртэл үргэлжилнэ” гэлээ. Сургалтын төгсгөлд Ажлын хэсгийн дарга гишүүдийн чиг үүрэг, хариуцсан ажлыг нь тодорхойлон төслийн хэрэгжилтийг үр дүнтэй зохион байгуулах чиглэлээр үүрэг, даалгавар өглөө.
