НИТХ-ын ээлжит II хуралдаан өнөөдөр болж байна. Хуралдааны эхэнд “Улаанбаатар 2040” хөгжлийн ерөнхий төлөвлөгөөний талаар мэдээлэл өгч, төлөөлөгчид асуулт асууж, хариулт авч байна.
НИТХ-ын төлөөлөгч, “Улаанбаатар орон сууцжуулалт” ХХК-ийн захирал З.ТӨМӨРТӨМӨӨ:
-Ашиглалтын шаардлага хангахгүй орон сууц, гэр хорооллын дахин төлөвлөлтийн төслүүдэд хотоос хамаарч буй асуудлууд байна. Гэр хорооллын дахин төлөвлөлт дээр дэд бүтцийнх нь асуудлыг хот өөрөө шийдэж өгөх ёстой. Гэтэл бид дэд бүтцийнх нь асуудлыг шийдэж өгөхгүйгээр компаниудад батламж өгчихдөг.
Компаниуд очоод байранд оруулна гээд 5-10 жил болдог. Иргэд тэр хугацаанд түрээсийн байранд, хамаатан садныдаа хөөгдөж туугдаад явж байна. Энэ айл өрхийн асуудлыг яг хэн хариуцах вэ.
Хариуцлагагүй компаниудыг маш олноор нь шалгаруулж ашиглалтын шаардлага хангахгүй орон сууцны тоог нэмж байна. 1960, 1970 оны газар хөдлөлтөд тэсвэргүй, инженерийн шугам сүлжээ нь тасалдсан, халуун хүйтэн усгүй гэр хороололд байгаа юм шиг орон сууцнууд олон байна. Энэ асуудлуудыг цааш нь хөдөлгөхөд Улаанбаатар хот төсөв санхүүгээр дэмжих шаардлагатай.
Иргэдийн гомдлууд тасрахгүй байна. Төр иргэдээ хамгаалж, компаниуд руу шалгалт оруулж, хар жагсаалтанд оруулах хэрэгтэй.
Түр суурьшуулах байр гэж НОСК-д байгаа цөөн хэдэн байр хүрэлцэхгүй байна. Тухайлбал, “Их газрын чулуу” ХХК 2019 оноос хойш 38 айлыг байранд оруулна гээд хашааг нь буулгачихсан. Эдгээр айлуудад түрээсийн байрны мөнгийг нь өгөхгүй одоо хаана хандахаа мэдэхээ больсон байдалтай байна.
ITC ХХК-иас болж 2020 оноос хойш 32 айл мөн л ийм байдалтай явж байна. Бид бүгд халуун дулаан байранд амьдарч байгаа учир энэ айлуудын зовлонг мэдэхгүй. Орон сууцны газар үндсэндээ сайн ажиллаагүй. Миний бие “Улаанбаатар орон сууцжуулалт” компанийг удирдаж байгаагийн хувьд хариуцлагатайгаар, иргэдээ хамгаалж, хотын нэрийн өмнөөс ажиллана гэдгийг хариуцлагагүй компаниудад хандаж хэлье.
Гэр хорооллын дахин төлөвлөлт дээр 38 төсөл хэрэгжүүлж байгаагаас долоон төсөл л идэвхтэй ажиллаж байна.
