Нийслэлийн худалдан авах ажиллагааны газраас гэр хорооллын өрхүүдэд стандартад нийцсэн зуух авч өгөх 28 тэрбум төгрөгийн тендер зарлажээ.
Тодруулбал tender.gov.mn сайтын мэдээллээр "Агаар, орчны бохирдлыг бууруулах хөтөлбөрийн хүрээнд гэр хорооллын дахин төлөвлөлтөд ороогүй айл өрхүүдийн эрчим хүчний зохистой хэрэглээг дэмжих төслийн хүрээнд стандартад нийцсэн ахуйн зуух худалдан авах ажил" хэмээх нэртэй тендерийг арванхоёрдугаар сарын 2-д нээлттэй зарласан байна.
Тендерийн нийт төсөвт өртөг нь 28,296,000,000₮ буюу 28 тэрбум төгрөг юм. Нийт 32 мянган ширхэг зуух авахаар заасан бөгөөд хувааж үзвэл нэг зуухыг 884,250 төгрөгөөр авах юм байна.
Дахиан төлөвлөлтөд ороогүй гэр хорооллын айл өрхүүдийг хамруулахаар цар хүрээ тогтоосон бөгөөд MNS5216:2016 стандартыг хангасан зуухны тоог нэмэгдүүлэх, иргэдийн эрүүл, аюулгүй орчинд амьдрал нөхцөлийг хангах зорилготой хэмээн тусгажээ.
Тендерийг 2024 оны арванхоёрдугаар сарын 24-ний өдрийн 09:00 цагаас өмнө тендер шалгаруулалтын баримт бичигт зааснаар илгээх бөгөөд 24-д нээнэ гэжээ.
Монгол Улсын нийт өрхийн 70 хувь нь гэр хороололд амьдардаг ба үүний 273 мянган өрх нь Улаанбаатар хотод байна.
