УИХ-ын Хууль зүйн байнгын хорооноос (2024.11.20) хүний эрх, эрх чөлөөг хамгаалахтай холбоотой “Эрүүдэн шүүлт тулгах, хүнлэг бус, хэрцгий хандахаас ангид байх хүний эрхийн хэрэгжилт” хяналтын сонсголыг зохион байгуулсан. Хяналтын сонсголыг УИХ-ын гишүүн П.Сайнзориг даргалсан юм.
Тэрбээр "Шүүхээс залруулга хийж, Т.Чимгээ, Б.Содномдаржаа нарыг С.Зоригийн амь насыг хөнөөсөн хэрэгт холбогдолгүй гээд шийдвэр гаргачихсан. Тиймээс сошиалаар балбаж, цахимаар яллаад байж болохгүй. Хуучин цагт хэн нэг дарга, шүүгч, прокурор хууль сахиулах байгууллага руу утасдаж нөлөөлдөг байсан бол өнөөдөр иргэд, олон нийт бүрэн мэдээлэлгүй байж хүмүүсийг сошиалаар яллаж, буруу дүгнэдэг. Энэ нь эргээд тухайн иргэн, түүний гэр бүлд маш их сэтгэлзүйн дарамт өгдөг. Тэгэхээр хууль шүүхийн байгууллага шийдвэрээ гаргаад алдаатай шийдвэрээ зөвтгөчихөөд байгаа зүйл дээр няхуур хянуур байхгүй бол улам хүний эрхийг дордуулаад байж болохгүй" гэв.
