Сөүл дэх Дээд шүүхийн Эрүүгийн хэргийн 5-р шүүхээс өнгөрсөн 17-ны өдөр Ю А Ин-ий хорих хугацааг 2 сараар сунгах шийдвэрийг гаргасан байна. Ю А Ин нь өнгөрсөн сард анхан шатны шүүхээс 1 жилийн хорих ял аван, хоригдсон билээ.
Эрүүгийн хэрэг хянан шийдвэрлэх тухай хуулийн дагуу шүүх нь, шүүх хурлын явцад яллагдагчийг 2 сарын хугацаанд хорьж болно. Гэвч шүүхийн шийдвэрийн дагуу, дээд шатны шүүх хурал бүрд 2 удаа тус бүр 2 сараар сунгах боломжтой юм.
Ю А Ин болон прокурорууд анхан шатны шүүхийн шийдвэрийг давж заалдаад байгаа бөгөөд Ю А Ин-ий давж заалдах шатны шүүх хурал энэ сарын 29-нд товлогдоод байна. Тэрээр хоригдсон байдлаар давж заалдах шатны шүүх хуралд оролцоно.
Ю А Ин нь 2020 оны 9 сараас 2022 оны 3 сар хүртэл нийт 181 удаа эмнэлгийн зориулалттай мансууруулах бодис хэрэглэсэн хэрэгт буруутгагдан шүүхэд дуудагдаад байсан юм. Мөн 2021 оны 5 сараас 2022 оны 8 сар хүртэл бусдын нэрээр эмнэлгийн мансууруулах бодис болох Стилноксыг тогтмол худалдан авсан хэрэгт холбогдсон байна.
Анхан шатны шүүхээс түүнд 1 жилийн хорих ял оноосон. Мөн 2 сая воны торгууль, 80 цагийн мансууруулах бодисоос урьдчилан сэргийлэх сургалтад хамрагдах, 1 сая 548 мянга 727 воныг хураан авах шийдвэр гаргасан байна.
Шүүхээс Ю А Ин болон түүний найз Чой нар 3 удаа каннабис татсан хэргийг мөн буруутай гэж үзжээ. Ю А Ин-ий пропофолын байнгын хэрэглээ болон эмнэлгийн зориулалттай мансууруулах бодисын байнгын хэрэглээг ч мөн буруутай гэж үзсэн байна.
Гэхдээ каннабисыг худалдсан болон татах зааварчилгаа, нотлох баримтаа устгах зааварчилгаа зэрэг хэрэгт буруугүй гэж үзсэн. Анхан шатны шүүх эдгээр хэрэгт хангалттай нотлох баримт байхгүй гэж дүгнэсэн байна.
