Барьцаат зээлийн гэрээгээр есөн настай хүүхдээр хурдан морь унуулж, авсан цалингаас нь суутгаж авдаг байсан уяачид холбогдох хэргийг шалгаж дуусаад прокурорт хүргүүлжээ.
Тодруулбал, Дорнод аймгийн нутаг дэвсгэрт 2023 оны гуравдугаар сард иргэн “А” нь бусадтай “Барьцаат зээлийн гэрээ” байгуулж, Хөдөлмөр Нийгмийн хамгааллын сайдын 2022 оны зургаадугаар сарын 10-ны өдрийн А/122 дугаар тушаалаар батлагдсан “Насанд хүрээгүй хүнийг ажлуулахыг хориглосон ажлын байрны жагсаалт”-д заасныг зөрчиж 9 настай хүүхдээр хурдан морь унуулж, авсан цалингаас нь суутгуулах нөхцөлтэйгөөр хүүхдийн эрүүл мэнд, бие бялдарт хохирол учруулахуйц аюултай хориглосон ажил эрхлүүлж байсан байна.
Тус хэрэгт мөрдөн шалгах ажиллагааг явуулж иргэн А-ийн үйлдэлд Эрүүгийн хуулийн тусгай ангийн 11.5 дугаар зүйлийн 1 дэх хэсэг, 16.10 дугаар зүйлийн 1 дэх хэсэгт тус тус зааснаар эрүүгийн хэрэг үүсгэж яллагдагчаар татан мөрдөн шалгах ажиллагааг явуулж, хэргийг энэ оны 10 дугаар сарын 18-ны өдөр шүүхэд шилжүүлэх саналтай прокурорын байгууллагад шилжүүлсэн байна.
