“Шинэ Хоршоо-Ногоон санхүүжилт-Уур амьсгалын өөрчлөлт-Бэлчээрийн экосистемийн хүлэмжийн хийн эргэлтийг тогтворжуулах” сэдэвт Монгол орны бэлчээрийн үндэсний форум-VII Төрийн ордонд өнөөдөр эхэллээ.
Форумд Байгаль орчин, хүнс, хөдөө аж ахуйн байнгын хорооны дарга Б.Бейсен үг хэлэв.
Тэрбээр хэлсэн үгэндээ, дэлхий нийтэд тулгараад байгаа уур амьсгалын өөрчлөлт, дулаарал, цаг агаарын гамшигт үзэгдлийн давтамж нэмэгдэж байгаатай холбоотойгоор цөлжилт, хуурайшилт ихсэж, уламжлалт мал аж ахуйн зонхилсон манай улсын ирээдүйд эрсдэл учруулахаар байна.
Эх газрын эрс тэс уур амьсгалтай Монгол орны хувьд уур амьсгалын өөрчлөлтийн нөлөөгөөр агаарын дундаж температур 2.25 хэмээр дулаарч, нийт нутаг дэвсгэрийн 76,9 хувь буюу 120,3 сая га талбай бүхий газар нутаг цөлжилтөд нэрвэгдсэнийг судалгаагаар тогтоосныг тодотголоо.
Бэлчээрийн үндэсний 7 дугаар форумын хүрээнд Уур амьсгалын өөрчлөлтийг даван туулах, дасан зохицох чадамжийг бэхжүүлэхэд малчдын хамтын чармайлт, Шинэ хоршоо-хөдөөгийн сэргэлт хөдөлгөөн, тогтвортой хөгжлийн механизмыг ашиглах, бэлчээрийн хөрсний нүүрстөрөгчийн шингээгүүрийг хэвийн барих замаар ашиглалтыг тэсвэрлэх, байгальд ээлтэй мал аж ахуйн үйлдвэрлэл эрхлэх шаардлага, малчдын тогтвортой амьжиргааг дээшлүүлэх шинэ боломж-нүүрстөрөгчийн зах зээлийн боломж, мал аж ахуйн салбар дахь ногоон санхүүжилт, нүүдлийн мал аж ахуй эрхлэгчдийн жил, залуу малчдын оролцоо зэрэг асуудлуудыг хэлэлцэхээр зорьж байна.
Форум маргааш дахин үргэлжилнэ.
