Өнгөрсөн нэгдүгээр сард Баянзүрх дүүргийн 26 дугаар хороо, Дүнжингарав худалдааны төвийн урд байрлах 207 дугаар байр хий тээвэрлэж явсан автомашин шатсаны улмаас дэлбэрэлтэд өртсөн. Үүний улмаас тус байрны 63 өрхийн 218 оршин суугчид өнөөдрийг хүртэл түрээсийн орон сууцанд амьдарч байна.
Уг баригыг нурааж шинээр барихын тулд тус байранд үл хөдлөх хөрөнгийн гэрчилгээтэй, 63 өрхийн нураахад татгалзах зүйлгүй гэсэн бичиг баримт болон гарын үсэг бүхий баталгаажуулалт хэрэгтэй аж.
Хэрвээ тус байрны оршин суугчид үүн дээр санал нэгдвэл барилгыг нурааж буцаагаад өмнө нь байсан зургаар нь, тэрдний амьдарч байсан метр квадратаар шинээр барьж өгөх аж. Хэрвээ уг бичиг баримт бүрдвэл 207 дугаар байрыг нураах тендерийг яаралтай зарлаж, ажлын 21 хоногт сонгон шалгаруулалт хийж, ажлыг цаг алдалгүй гүйцэтгүүлэхээр нийслэлээс төлөвлөжээ. Тендерийн төсөвт өртөг 2.4 тэрбум төгрөг байна гэж Барилгын хөгжлийн төвөөс магадлажээ.
Нэг л айл нураахаас татгалзах юм бол тухайн хүний өмч хөрөнгийг нураах боломжгүй юм байна. Хэрвээ тухайн иргэний байр орон сууц ипотекийн зээл, банкны барьцаанд байгаа тохиолдолд банктайгаа хамтарч тодорхойлолт гаргаж өгнө. Харин бид банканд энэ барилгыг 2025 он гэхэд шинээр босгож айлуудад хүлээлгэж өгөх албан бичгийг нийслэлээс хүргүүлэх аж.
Байрыг нураахдаа бусад эргэн тойрны барилгуудад сөрөг нөлөө үзүүлэхгүйгээр байрны дээд хэсгээс эхлүүлээд давхар бүрээр нураах шийдлийг гаргаж, тендерийн баримт бичгийг боловсруулжээ
Тухайн 207 дугаар байр дэлбэрэлтэд өртсөний улмаас хананы бетонд нүүрс хүчлийн хий үүсч, барилгын үндсэн хийцлэл алдагдаж, ан цав гарч, арматур зэвэрсэн. Мөн маш бага баллын газар хөдлөлтөд ч тэсвэргүй болсон гэсэн дүгнэлтийг эрдэмтэн, судлаачид удаа дараа хэлсэн байдаг.
