Азийн хөгжлийн банк "Азийн хөгжлийн шинэчилсэн төлөв 2024" тайланг өнөөдөр танилцуулав. Энэ үеэр Монголын эдийн засгийн төлөвийг ч танилцууллаа.
Гадаад эрэлт өсч, дотоодын хэрэглээ, Засгийн газрын зардал нэмэгдэж, манай эдийн засаг тогтвортой өсөж байна. Иймд Азийн хөгжлийн банк энэ оны дотоодын нийт бүтээгдэхүүн (ДНБ)-ий өсөлтийн таамаглалаа өсгөжээ.
Тэд 2024 оны 9-р сарын Азийн хөгжлийн төлөв тайландаа Монголын эдийн засаг 2024 онд 5.5 хувиар өснө гэж тооцоолсон. Энэ нь өнгөрсөн дөрөвдүгээр сард 4.1 хувиар өснө гэж таамагласнаас нэмэгдсэн байна.
Харин ирэх оны эдийн засгийн өсөлтийн таамаглалаа 6.0 хувь хэвээр үлдээжээ. Эдийн засгийн өсөлтийг үйлчилгээ, аж үйлдвэрийн салбарууд, тэр дундаа уул уурхайн салбарын өсөлт цаашид ч дэмжих төлөвтэй байна. Харин Сангийн яам ирэх оны эдийн засгийн өсөлт 8 хувь байна гэсэн юм. Инфляц 7.2 хувьд хүрэх төлөвтэй.
“Монгол Улсын эдийн засгийн өсөлт энэ оны эхний хагаст үргэлжилсээр байгаа нь сайн мэдээ юм. Ирээдүйд тохиож болзошгүй цочролоос хамгаалах нөөц бий болгох, өргөн цар хүрээтэй, төрөлжсөн эдийн засгийн өсөлтийг дэмжих хөрөнгө оруулалт хийхэд өсөлтийн мөчлөгийг чиглүүлэх нь чухал " гэж АХБ-ны Монгол Улс дахь Суурин төлөөлөгч Шэннон Коулин хэллээ.
Уул уурхайн олборлолт төсөөлж байснаас хурдан нэмэгдсэнтэй холбоотойгоор эдийн засгийн өсөлт энэ онд өндөр байна. Уул уурхайн олборлолтыг даган экспорт нэмэгдэж, тухайлбал нүүрсний экспорт 2024 оны эхний хагаст өмнөх оны мөн үеэс 37.6 хувиар өсжээ.
Энэ нь төсвийн орлого нэмэгдэж, үйлчилгээний салбарууд өсөхөд, тэр дундаа ачаа тээврийн салбарт өсөлт гарахад нөлөөлжээ. Мөн инфляц буурч, төрийн албан хаагчдын цалин нэмэгдсэнээр дотоодын эрэлт өссөн нь эдийн засгийн өсөлтийг дэмжсэн байна.
Инфляц мэдэгдэхүйц буурч, төв банкны зорилтот түвшинд багтаж байна. Хэрэглээний үнэ энэ онд 6.8 хувиар өсөх төлөвтэй байгаа нь дөрөвдүгээр сарын таамаглалаас бага зэрэг доогуур байна.
Харин ирэх онд инфляц өмнө төсөөлснөөс нэмэгдэж, 7.2 хувьд хүрэх төлөвтэй байгаа нь дотоодын эрэлт, төсвийн зардал нэмэгдсэн зэргээс шалтгаалжээ.
Төсөөллийг бууруулж болзошгүй эрсдэлүүд нь Бүгд Найрамдах Хятад Ард Улс руу гаргах түүхий эдийн экспортын эрэлт буурах, Оюутолгой уурхайн олборлолт саарах, геополитикийн хурцадмал байдал болон цаг уурын нөлөөллөөс шалтгаалан барааны үнэ буурах, нийлүүлэлтийн сүлжээ тасалдах зэрэг болно.
