2024 оны наймдугаар сарын судалгаагаар Ерөнхий боловсролын сургуулиудад бага ангийн багш, хими, физик, биологи, англи хэл, математикийн нийт 4292 багш хэрэгтэй байгаа аж. Иймд багш нарын дутлыг нөхөх зорилгоор математикч, физикч, химич, нагли хэлний орчуулагч зэрэг мэргэжил эзэмшсэн хүмүүсийг багшлах эрхийн 45 хоногийн сургалтад хамруулаад багшлуулах асуудлыг боловсролын яамнаас хөндөх болсон. Тэгвэл уг асуудлыг өнөөдөр Боловсролын сайд П.Наранбаяр Засгийн газрын гишүүдэд танилцууллаа.
Багшлах хүний нөөцийг нэмэгдүүлэх чиглэлээр дараах арга хэмжээг үе шаттай хэрэгжүүлэхээр төлөвлөж, зарим арга хэмжээг эхлүүлээд байна.
1. Багш мэргэжлээр төгссөн ч ажил эрхлээгүй байгаа хүний нөөцийг ашиглах
2. Тэтгэвэрт гарсан багш нарыг цөөн цагаар ажиллуулах
3. Шинжлэх ухааны чиглэлээр их, дээд сургууль амжилттай төгссөн эсвэл 3-4 дүгээр ангид суралцаж байгаа оюутнуудыг багшийн ажилд татан оролцуулах
4. Сургалтын цагийн норм 19 цагт хүрдэггүй зарим багш нарыг хөрвүүлж, ижил төстэй хичээл заалгах
5. Багш бэлтгэх их, дээд сургуулийн төгсөх ангийн оюутнуудыг дадлагажигч багшаар ажиллуулах
6. Цахим сургалтыг багшийн дутагдал өндөр байдаг хичээл, сургалтад түлхүү ашиглах
Эдгээр арга хэмжээнээс тэтгэвэрт гарсан багш нар болон багш бэлтгэх их, дээд сургуулийн дөрөвдүгээр ангийн оюутныг дадлагажуулагч багшаар ажиллуулах арга хэмжээг энэ хичээлийн жилээс хэрэгжүүлж эхлээд байгаа юм байна.
