НИТХ-ын сонгуульд 2020 онд хамгийн олон хүний саналаар сонгогдсон З.Төмөртөмөөг энэ удаад онцолж байна. Түүний хувьд НИТХ-д Чингэлтэй дүүргээсээ дахин нэр дэвших квотоо авсан юм.
Төрийн ордны тамхины цэгээс мэдээлж байна гэдэг шиг түүний талаарх жиг жугийг сонсох нь ээ улс төрд чимээгүй яван чангарч буй залуу гэх. Гэхдээ өнгөрсөн жилүүдэд жалга довны үзэл гаргаж, зөвхөн өөрийн тойрог дүүрэгтээ хөрөнгө оруулалтын ажлуудыг төвлөрүүлсэн нь олон ажлаас нь тод харагдана.
Бүр тодруулбал, З.Төмөртөмөө нийслэлийн орлогчоор 3 жил ажиллах хугацаандаа хотын хамаг төсвийг Чингэлтэй дүүрэг рүү цутгасан.
Үүнээс хэдхэн жишээ дурдахад л, "Цэвэр агаар нэмэлт санхүүжилтын төсөл"-өөр фасад, газрын гүний дулаан гэх мэт 20 тэрбумын хөрөнгө оруулалтыг зөвхөн Чингэлтэй дүүрэг рүүгээ оруулсан байна. Энэхүү төсөлд нь, Чингэлтэй дүүргийн Ерөнхий боловсролын сургуулиуд, хүүхдийн цэцэрлэг, эмнэлэг гээд хамрагдаагүй газар тун цөөн. Дээр хэлсэнчлэн чимээгүй хэрнээ, алга ташуулах юмаа аль эрт бэлдчихсэн айхавтар хүн гэж түүнийг нэрлэе.
7 буудлын замаар явахад л баруун гар талд нь байрлах Чингэлтэй дүүргийн гэрэлтүүлэг, гудамж дундуурх засмал зам хийгдсэн байдлаас л хотын төсвөөр тойргоо хэрхэн яаж тордсоныг анзаарч харж болохоор.
Гэтэл яг энэ замын зүүн гар талд нь байрлах Сүхбаатар дүүргийн тухайн бүс, хорооны нөхцөл байдлыг яривал бас нэг өөр зураглал анзаарагдана шүү.
Энэ мэтээр нийслэлийн төсвийг тойрогтоо цутгасныг нь түмэн олон мэдэж байгаа юм болов уу даа.
