Өнгөрсөн дөрөвдүгээр сарын 17-ны өдөр Чингэлтэй дүүргийн нутаг дэвсгэр, Хайлааст орчимд зам тээврийн ноцтой осол гарч, ослын улмаас долоон хүн гэмтэж бэртэн нэг хүүхэд газар дээрээ нас барсан байдаг.
Тодруулбал, Prius, Verna хоёр автомашин мөргөлдсөний улмаас тухайн хэсэгт явганаар зорчиж байсан 9-14 насны 6 хүүхэд, насанд хүрсэн 1 хүнийг мөргөсөн харамсалтай осол болж, 16 настай охин нас барсан.
Уг хэрэгт Эрүүгийн хуулийн 27 дугаар зүйл буюу "Гэмт хэрэг болгоомжгүй үйлдэх" гэсэн хэсэгт заасны дагуу яллах дүгнэлт үйлдэж, шүүхэд шилжүүлсэн аж. Энэ дагуу өнгөрсөн наймдугаар сарын 29-ний өдөр Баянзүрх, Сүхбаатар, Чингэлтэй дүүргийн ЭХАШШ-д шүүх хурал болж, шийдвэрээ гаргажээ. Тодруулбал,
Осолд холбогдсон жолооч эмэгтэйг “Авто тээврийн хэрэгслийн жолооч хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний актыг зөрчсөний улмаас 2 хүний эрүүл мэндэд хүнд хохирол, 3 хүний эрүүл мэндэд хүндэвтэр хохирол, 1 хүний эрүүл мэндэд хөнгөн хохирол тус тус учруулж, 1 хүний амь насыг хохироосон” буюу Эрүүгийн хуулийн 27.10 дугаар зүйлийн 3 дахь хэсэгт заасан гэмт хэрэг үйлдсэн гэм буруутайд тооцож, тээврийн хэрэгсэл жолоодох эрхийг 8 жилийн хугацаагаар хасаж, 2 жилийн хугацаагаар хорих ял оногдуулан шийдвэрлэжээ.
Мөн гэмт хэргийн улмаас бусдад учирсан 164.398.151 төгрөгийн хохирлыг шүүгдэгчээс гаргуулан насанд хүрээгүй хохирогч нарын хууль ёсны төлөөлөгч, иргэний нэхэмжлэгч нарт тус тус олгуулахаар шийдвэрлэсэн" байна.
