Сэтгэлзүйч М.Алтанцэцэг зөвлөж байна.
ӨНГӨРСӨН ӨДРҮҮДЭЭ БҮҮ ХООЛЛО
-Өнгөрсөндөө ач холбогдол өгдөг хүний бие сэтгэл нь ямагт ухарч байдаг. Тэгээд бүх ухралт нь харамсал, шарх болон үлддэг. Тиймээс өнгөрсөнтэйгээ "салах ёс хийх"-ээс нааш энэ бүхэн үргэлжилсээр, таныг зовоосоор, амжилт амар тайван, эрүүл мэндэд тань заналхийлсээр байх болно.
Мэдээж, өнгөрснөө хооллохгүй байх тийм ч амархан асуудал биш. Яагаад гэвэл харамсал гэдэг сэтгэл хөдлөл бидний амьдралыг салхи мэт гэнэт бүрхэн авдаг гэм биш зан болой.
Таны толгойд гэнэт өнгөрсөн үеийн харамсалтай үеүд санагдаж "тэгсэн ч болоосой, ингэсэн байсан бол ...." гэсэн эцэс төгсгөлгүй бодлууд орж ирэх үед энэ бодлоо зогсоох гэж оролдоорой. Муу бодлоо зогсоож сурах нь үр дүнтэй арга юм. Өөртөө шууд тушаа "ЗОГС", гэж өөртөө хэлээд бодлоо өөр чиглэлд шилжүүлэхийг хичээ. Аяндаа суралцана. Тархи яг л булчин шиг ажилладаг. Та энэ дасгалыг хийх тусмаа үр дүнг нь хүртэх болно.
Бидэнд хэрэгтэй зүйл бол өнөөдөр бас маргааш. Тиймээс өнгөрснөө бодож, гуньж гутрах цагаа ирээдүйн сайны төлөө зориул. Ямарч үед өнгөрснөө бүү хоолло.
