Өнгөрсөн шөнө /8 сарын 22-ны шөнө/ байнгын хорооны хуралдаан хуралдаж тендерийн тухай хуулийг хэлэлцсэн ч гишүүдийн олонхийн саналаар уг асуудлыг унагаасан байна. Энэ талаар УИХ-ын гишүүн Ч.Лодойсамбуугаас тодруулллаа.
"Тендерийн буюу худалдана авах ажиллагааны тухай хуулийг Төсвийн тодотголыг дагуулж, "нууж" оруулж ирж, төсвийн тодотголтой хамт яаран хэлэлцэх шаардлагагүй. Энд бараг зүйл заалт бүрээрээ хууль тогтоомжийн тухай хууль, зарим заалтууд бүүр үндсэн хууль зөрчсөн байна.
Жишээ татахад "Ногоон автобусны" дуулиан 200 гаруй тэрбум. Үүнтэй харьцуулахад хэдэн зуу дахин их мөнгийг бид сонгон шалгаруулалтгүй зарцуулах энэ ажлын эхэн дээр зогсож байна. Тэгэхээр жилийн дараанаас бид нар дахиад нэг сонсгол хийх тухай, дахиад хэн нэгэнд хариуцлага тооцох тухай, шоронд хийх тухай ярина.
Өчигдөр УИХ-ын тамгын газраас Тендерийн хуулийн төсөл дээр хууль зүйн дүгнэлт гаргаж байна. Заалт бүрээр нь дүгнэсэн байсан. Үүнийг нэг үгээр хэлэхэд "Энэ хууль бүтэхгүй" гэж дүгнэлт гаргаж байна.
Тиймээс энийг эргүүлээд татъя, Засгийн газарт нь буцаая. Том ажил гацах вий гэсэн болгоомжлол байгаа нь үнэн. Гэхдээ тусд нь хэлэлцэх нь тийм их хугацаа авна гэж бодохгүй байгаа.
Бид нар дандаа ингэж хурдан, түргэн, яаралтай хийе гэсэн ажил болгоныхоо ард дандаа алдаж байсан. Дандаа хулгай, авилга явж байсан.
Шинэ 30 жилийн хөгжил яриад байна. Гэтэл шинэ 30 жилийн хулгай эхлэх гэж байна. Өнгөрсөнд авч хэлэлцсэн нүүрсний хулгай, ногоон автобус зэрэг асуудлуудыг ирээдүйд үүсч байгаа эрсдэлтэй харьцуулахад киноны трэйлэр, тийсэр. Ийм том юмны эхлэл дээр байна." гэв
