УИХ-ын ээлжит бус чуулганаар 2024 оны төсвийн тодотгол болон түүнийг дагасан чухал хуулиуд хэлэлцэгдэж буй. Гэсэн ч энэ парламентийн шинэ гишүүд эдгээр асуудлуудад нухацтай хандаж чадаж байгаа гэдэгт эргэлзэх хүмүүс цөөнгүй. Тиймээс хашир туршлагатай УИХ-ын гишүүн Ж.Бат-Эрдэнээс танхимын шинэ гишүүдийн талаарх байр суурийг нь тодрууллаа. Тэрбээр,
-"Бидний хийсэн хамгийн том өөрчлөлт бол холимог тогтолцоо. Холимог тогтолцоогоор 48 гишүүнээ жагсаалтаар оруулж ирж байна. Тэд мэдээж өөр өөрсдийн салбар дээрээ мэргэшсэн хүмүүс байгаа. Гэхдээ парламентийн дэг журам, дэгийн тухай хууль эд нараа мэдэхгүй.
Гэхдээ тойрог гэж ардаа татлаа түтлээгүй, мэргэжлийн боловсорсон хүмүүс нь орж ирээд том төслүүд дээрээ кнопдох ёстой. Тийм учраас энэ хүмүүстээ дадлагажих боломж бололцоог нь олгох ёстой.
Нөгөөтэйгүүр нэг дутагдалтай зүйл харагдаад байгаа нь бид хэтэрхий туйлшраад залгамж халаа гэдэг юмаа алдчих гээд байна. Жагсаалтаар дан туршлага дадлагагүй хүмүүс оруулаад ирлээ ш дээ. Мэдлэгтэй байж болно. Боловсролтой байж болно. Гэхдээ төрийн албаны дадлагагүй хүмүүс орж ирээд л яаман дээр ямар бодлого явагддаг, тэр нь Засгийн газар дээд зангидагдаад, байнгын хороон дээр шүүгдээд, УИХ-аар батлагдаад гэсэн энэ зарчим мэдэхгүй болохоор л өнөөдөр хөндлөнгөөс харахад сул харагдаад байгаа юм. Үндсэндээ дадлагажуулах газар болчихоод байна." хэмээлээ.
