Засгийн газрын өнөөдрийн хуралдаанаас гарсан шийдвэрүүдийн талаар холбогдох сайд нар мэдээлэл өгч байна. Энэ үеэр Боловсролын сайд П.Наранбаяр,
"Энэ жил 2-5 насны 142150 хүүхэд цэцэрлэгт суралцахаар байгаа. Үүнийг E-Mongolia системээр бүртгээд хуваарилалтуудыг хийсэн. 1-р шатны бүртгэлээр 103999 хүүхэд бүртгэгдсэн. Хүүхдүүдийн цэцэрлэгийн хуваарилалтыг 8 сарын 20-21-ний хооронд эцэг эхийнх нь гар утсанд мэссэжээр хүргүүлж байна. 2-р шатны цахим бүртгэл 9 дүгээр сарын 5-15-ны өдрүүдэд явагдана. Хүсэлт гаргасан хүүхэд бүрийг цэцэрлэгт хамруулна. Энэ жил 11,768 хүүхдийн хүчин чадалтай 368 бүлэг бүхий 94 байрыг сургалтын зориулалтаар түрээслэхээр шийдвэр гаргасан. Мөн хамран сурах тойргоо тогтоолгосон хувийн хэвшлийн 274 цэцэрлэгт 15000 хүүхдийг хувьсах зардлыг нь төрөөс өгч үйл ажиллагааг нь явуулахаар зохицуулалтыг хийсэн.
НБГ-аас ерөнхий боловсролын 36 сургуулийн 560 бүлгийн 23,188 хүүхэд 3 ээлжээр хичээллэх эрсдэлтэй байна. Тиймээс уг асуудлыг шийдвэрлэхийн тулд 29 сургуульд нэмэлтээр сургалтын зориулалттай байр түрээслэхээр ярьж байгаа. Үүнээс 22 сургуулийг шийдвэрлэсэн. Эдгээр 22 сургуульд 15,955 хүүхэд суралцах боломжтой байна.
ЕБС-ийн 1-р ангийн элсэлт И-Монголиа системээр явагдаж байна. Бүртгэл энэ сарын 25-ныг хүртэл үргэлжилнэ." гэлээ.
