Улсын хэмжээнд ажиллаж буй станцуудын өгөгдөл хуваарилалтын серверт гэмтэл гарч, улмаар системийн доголдол үүсч нийт 43 станцын үйл ажиллагаа тасалдсан байна. Уг асуудалтай холбоотойгоор Засгийн газрын хэрэгжүүлэгч агентлаг Газар зохион байгуулалт, геодези, зураг зүйн ерөнхий газар-аас мэдэгдэл гаргалаа.
Тус мэдэгдэлд, "ГЗБГЗЗЕГ-ын хариуцан ажиллуулдаг нийслэлийн 4 дүүрэг, 21 аймгийн нутаг дэвсгэрт суурилуулсан байнгын ажиллагаатай станцуудын өгөгдөл хувиарлалтын (GNSS-CORS) NTRIP удирдлагын програм хангамж бүхий серверт 2024 оны 08 дугаар сарын 10-ны өдөр цахилгааны хэлбэлзлээс үүдэлтэй гэмтэл гарч, улмаар систем хандалтын доголдол үүссэн тул нийт 43 станцын үйл ажиллагаа тодорхойгүй хугацаагаар тасалдсан болохыг мэдэгдэж байна.
Иймд та бүхэн тус газрын байнгын ажиллагаатай станцын бодит агшны засвар дамжуулалтыг (RTK) ашиглахаар төлөвлөсөн хээрийн хэмжилтийн ажлуудаа тухайн нөхцөл байдлыг харгалзан үзэж зохион байгуулахыг хүсье.
Бид үүссэн нөхцөл байдлыг судлан холбогдох арга хэмжээг авч станцын хэвийн үйл ажиллагааг хангахаар ажиллаж байна." гэжээ.
